- Udal hautetsi agurgarri hori:
Joan den martxoaren 31an, Irunen, jatorri politiko anitza dugun 7 herrialdetako alkate zein zinegotzi talde batek, bizi dugun aro politiko berria aintzat hartuz eta Euskalduna jauregiko batzar eratzailean adosturiko 5 printzipioetan oinarriturik, Udalbiltza berrantolatzeko proposamena luzatu dugu, hautetsien arteko atxikimendu-kanpaina abian jarriz.
Udal hautetsia zaren heinean, Udalbiltzaren berrantolaketaren beharrarekin bat egin dezakezulakoan, ekimenari atxikitzeko proposamena luzatu nahi dizugu.
Udalbiltza berrantolatzeko udal hautetsien ekimenaren sustatzaileak
Euskal Herrian, 2012ko apirilean - Zertarako Udalbiltza 2012an?:
Euskalduna jauregian onarturiko 5 printzipioetan oinarrituz Udalbiltzaren jarduera bateratuan Euskal Herria aintzat hartzen dugun udal hautetsi guztiok elkarrekin aritzeari deitzen diogu Udalbiltzaren berrantolaketa. Elkarlanerako garaia heldu da. Ez dugu ezer berri sortzeko beharra aldarrikatzen, 12 urtetan zehar egon diren espresio ezberdinen arteko batze eraikitzailea baizik.
12 urtetan metatu den lanari etekina ateratzen jakin behar dugu. Izaniko arrakastetatik zein porrotetatik ikasiz, bai, baita esperientzia erabiliz, baina gaur egun hautetsiek dituzten idei berriei ere guztiz irekiak egon behar dugu. 2012. urtean Udalbiltzak egin ahal dituen ekarpenak, izan behar duen antolakuntzaz, lehentasunak, egitasmoak... asko baitago egiteke oraindik ere alor hauetan. Denok gara beharrezkoak, denok daukagu tokia funtzionamendu guztiz demokratikoa izan behar duen nazio instituzioan.
cc-by-sa-3.0 Udalbiltza